Swagger مبقاش معتمد إبتداء من الإصدار رقم 9 ديال NET.
أكيد أنكم شفو ولا سمعتو باللي خاصية Swagger تم الإلغاء ديالها مع الإصدار رقم 9 ديال NET. اللي تم ف 12 نونبر من هاذ السنة. آجيو نكتشفو التفاصيل، ونتعرفو على الخيارات المتاحة للمطورين فمنظومة NET. و اللي غادي تمكن من توفير الدعم ديال OpenAPI فال Web APIs المطورة ب ASP.NET Core إبتداء من 9 NET.
السياق ديال هاذ القرار
هذا القرار كان عبارة عن إعلان رسمي عبر موقع GitHub اللي قام بيه الفريق اللي كيقوم بتطوير ASP.NET Core، الشيء اللي خلق شوية ديال القلق عند الكوميونيتي ديال NET.
و كيفما وصف كاتب الإعلان، غادي يتم تعليق شحن باكيج Swachbuckle.AspNetCore كإعتماد لقوالب مشاريع ASP.NET Core Web API إبتداء من الإصدار 9 ديال NET.
هاذ الحزمة أو الباكيج اللي تم الدمج ديالها إبتداءً من الإصدار رقم 5 ديال NET. كتقدم دعم مدمج بشكل إفتراضي لمعيار OpenAPI بالإضافة لواجهة Swagger اللي كتمكن المطورين المستعملين لمنظومة NET. من إختبار والتفاعل مع ال Web APIs اللي كيطوروها.
علاش تم إتخاذ قرار تعليق هاذ الحزمة
السبب الأساسي اللي خلى Microsoft تخلى على الخدمات ديال هاد الحزمة هو غياب التفاعل من طرف المسؤول عن الصيانة ديالها واللي ماقامش بتقديم دعم رسمي ل 8 NET. عن طريق تحديث إصدار NET. المعتمد واللي بقا متوقف عند الإصدار رقم 7، هذا بالإضافة لمجموعة من المشاكل المفتوحة على صفحة مستودع الحزمة على موقع GitHub واللي مقامش المطور بالمعالجة و الحل ديالها
فريق تطوير ASP.NET Core قرر أنه يقوم بتوسيع المكتبة الداخلية Microsoft.AspNetCore.OpenApi باش توفر دعم تلقائي لمعيار OpenAPI بدل الإعتماد على حزمة Swachbuckle
هذا ما كيعنيش أن هاذ الحزمة غادي يتم الحذف ديالها أولا مغاديش تبقا متاحة، مزال يمكن لأي مطور يقوم بالدمج ديالها فالمشاريع ديالو إيلا بغا، بحالها بحال أي حزمة اللي كتوفر نفس الخدمات، على سبيل المثال حزمة NSwag اللي بالإضافة لتوفير دعم معيار OpenAPI كتساعد المطورين على إنتاج الكود الخاص بالعملاء والخوادم اعتمادا على وثيقة OpenAPI